आमदार ज्ञानेश्वर म्हात्रेंकडून माध्यमिक शाळांना ” सोलर हायब्रीड इन्व्हर्टर ” चे वाटप…
राजू तावडे / सावंतवाडी :- सावंतवाडी विधानसभा मतदारसंघात लवकरच ‘सुभाषचंद्र बोस शाळांची निर्मिती ‘ करण्यात येणार असून सावंतवाडी, वेंगुर्ला व सासोली याठिकाणी या शाळांची लवकरच उभारणी होणार आहे. ज्या शाळेत पटसंख्या कमी असते आणि तिथल्या मुलांना उत्कृष्ट शिक्षण घेता येत नाही अशा मुलांसाठी या शाळांची निर्मिती करण्यात येत असल्याची माहिती शालेय शिक्षण मंत्री दीपक केसरकर यांनी आज सोमवारी सायंकाळी येथे दिली.
कोकण विभाग शिक्षक मतदार संघाचे आमदार ज्ञानेश्वर म्हात्रे यांच्या प्रयत्नाने सिंधुदुर्ग जिल्हा वार्षिक योजनेतंर्गत सिंधुदुर्ग जिल्ह्यातील १६० माध्यमिक शाळांना ” सोलर हायब्रीड इन्व्हर्टर ” चे वाटप करण्याचा कार्यक्रम सावंतवाडी येथील आर. पी. डी. हायस्कूलच्या सभागृहात आयोजित करण्यात आला होता. यावेळी उपस्थित शिक्षकांना मार्गदर्शन करताना केसरकर बोलत होते.
यावेळी आ. ज्ञानेश्वर म्हात्रे, माजी आमदार शंकर कांबळी, शिवसेनेचे जिल्हाप्रमुख अशोक दळवी, भाजपचे आंबोली मंडल अध्यक्ष रवि मडगांवकर, शहर मंडल अजय गोंदावळे, माजी शिक्षण सभापती गुरुनाथ पेडणेकर, माजी पंचायत समिती सदस्य संदीप गावडे, भाजपचे वेंगुर्ले तालुका अध्यक्ष सुहास गवंडळकर, सिंधुदुर्ग जिल्हा मुख्याध्यापक संघाचे अध्यक्ष वामन तर्पे, सचिव गुरुदास कुसगावकर, जिल्हा उपाध्यक्ष सुहास देसाई ,आर पी डी चे मुख्याध्यापक जगदीश धोंड यांच्यासह विविध शिक्षक संघटनांचे पदाधिकारी उपस्थित होते.
सध्याचे युग हे तंत्रज्ञानाचे युग आहे. त्यामुळे प्रत्येक शाळेमध्ये आधुनिक तंत्रज्ञान यायला हवे ही आमची नेहमीच भावना राहिली आहे. आर्टिफिशियल इंटेलिजन्स सारखे आधुनिक तंत्रज्ञान जास्तीत जास्त मुलांपर्यंत पोहोचण्यासाठी आमचे प्रयत्न आहेत. याच पार्श्वभूमीवर आमदार ज्ञानेश्वर म्हात्रे यांच्या प्रेरणेतून सर्व शाळा डिजिटल करण्याबरोबरच सौरऊर्जेच्या माध्यमातून ग्रीन शाळा ही संकल्पना राबविली जात आहे. शिक्षकांनी या सुविधांचा वापर करून पुढील काळात आपले पूर्ण लक्ष हे मुलांच्या शिक्षणावर केंद्रित करावे. डोंगरी शाळेंच्या पटसंख्येचा निकष २० वरून १५ वर आणण्यात आला आहे तर अल्पसंख्यांक प्रवर्गातील शाळांच्या पटसंख्येचा निकष तीस वरून वीस वर आणण्यात आला आहे ,अशी माहिती केसरकर यांनी यावेळी दिली.
