राजू तावडे / सावंतवाडी :- सावंतवाडीचे सुपुत्र, भाजप नेते ॲड. राहुल नार्वेकर हे पुन्हा एकदा विधानसभेचे अध्यक्ष होणार आहेत. त्यासाठी त्यांनी आज अध्यक्षपदाच्या निवडणुकीसाठी उमेदवारी अर्ज दाखल केला. मुख्यमंत्री देवेंद्र फडणवीस, उपमुख्यमंत्री एकनाथ शिंदे, उपमुख्यमंत्री अजित पवार यांच्या उपस्थितीत विधिमंडळ सदस्य ॲड. राहुल नार्वेकर यांनी अर्ज दाखल केला आहे.
यावेळी विधिमंडळ सदस्य तथा भाजपाचे प्रदेशाध्यक्ष चंद्रशेखर बावनकुळे, सदस्य चंद्रकांतदादा पाटील आदी उपस्थित होते. राहुल नार्वेकर हे गेल्या अडीच वर्षाच्या शिंदे सरकारमध्येही विधानसभेचे अध्यक्ष होते. ते सावंतवाडीचे सुपुत्र असून कुलाबा मतदारसंघाचे ते आमदार आहेत.
महाविकास आघाडीकडून राहुल नार्वेकरांना आव्हान दिले जाणार असल्याची शक्यता होती. मात्र, आता महाविकास आघाडी उमेदवार देण्याची शक्यता फारच कमी आहे. त्यामुळे राहुल नार्वेकर हेच विधानसभा अध्यक्ष होणार असल्याचे जवळपास निश्चित झाले आहे.
