मुंबई: लोकल थांबवून मोटरमनने वाचवले जखमी महिलेचे प्राण

11

मुंबई: रेल्वे ट्रॅकवर जखमी अवस्थेत मदतीची याचना करणाऱ्या एका महिलेसाठी मोटरमनने ट्रेन थांबवली. कर्तव्यावर असतानाही माणुसकी न विसरलेल्या या मोटरमनचं नाव सतीश टोंगळे आहे. मध्य रेल्वेच्या विद्याविहार आणि घाटकोपर स्थानकादरम्यान बुधवारी ही घटना घडली.

पल्लवी अवनूर (२५) ही महिला बुधवारी दुपारी २ वाजण्याच्या सुमारास विद्याविहार-घाटकोपर स्थानकादरम्यान ट्रॅकवर विव्हळत पडली होती. त्याचवेळेस सीएसएमटीहून अंबरनाथला जाणारी स्लो लोकल तेथून जात होती. ती महिला हात हलवून मदत मागत असलेली मोटरमनसतीश यांना दिसली. त्यांनी तत्काळ ट्रेन थांबवली आणि गार्ड नरेंद्र हांडे यांनी या घटनेची माहिती दिली. त्यांनी एका तरुणाच्या (ज्याची ओळख कळली नाही) आणि इतर प्रवाशांच्या मदतीने जखमी पल्लवीला ट्रेनमध्ये घेतले.

घाटकोपर स्टेशनवर घटनेची माहिती देण्यात आली. तेथे स्ट्रेचर आणि रुग्णवाहिका आणण्यात आली आणि पल्लवीला राजावाडी रुग्णालयात दाखर करण्यात आले. तिच्या कुटुंबीयांनी नंतर तिला कुर्ला येथील कोहिनूर रुग्णालयात हलवले. ती गंभीर जखमी आहे. कुर्ला रेल्वे पोलीस स्टेशनचे वरिष्ठ पोलीस निरीक्षक एम.एम. इनामदार यांनी सांगितले की, ‘पल्लवीच्या डोक्यावर आणि छातीवर मार लागला आहे. ती अजूनही बेशुद्ध आहे. त्यामुळे तिचा जबाब घेण्यात आलेला नाही.’